பியூட்டி டிப்ஸ்: முடி இல்லாத பிரச்சினைக்கு என்னதான் முடிவு?

Published On:

| By Kavi

What is the solution to hair loss problem?

‘பொதுவாக மனிதனின் உடல் முழுவதும் சுமார் ஐந்து லட்சம் முடி இருக்கலாம். அதில் தலையில் மட்டும் ஒரு லட்சத்துக்கும் மேற்பட்ட முடி இருக்கலாம். 20 வயது வரையில் ஒருவருக்கு முடியானது நல்ல வளர்ச்சியோடு இருக்கும். 30 வயதை நெருங்கும்போது, பொதுவாக எல்லோருக்கும் 10 சதவிகித முடி குறையத் தொடங்கும்.

இதற்கு மேல் கூடுதலாக 20 சதவிகித முடி குறையும்போதுதான் பிரச்னை உருவாகிறது. அதாவது 20 வயதில் 30 சதவிகித முடியும், 30 வயதில் 50 சதவிகித முடியும் குறைந்தால், மருத்துவரை அணுக வேண்டியது அவசியம்” என்கிறார்கள் தோல் சிகிச்சை மருத்துவர்கள்.

மேலும், ”முன்பெல்லாம் ஆண்களுக்குதான் முடி உதிர்ந்து வழுக்கை விழும். ஆனால், இன்றோ 33 சதவிகித பெண்களுக்கும் வழுக்கை விழத் தொடங்கிவிட்டது.

ஷாம்பு, தைலம் என விளம்பரங்களைப் பார்த்து வாங்கிக் குவித்தாலும் முடி மட்டும் முளைப்பது இல்லை. இதற்கு, நம் தலையின் மீது உள்ள உறைப் பைகளில் ஹார்மோன் சுரப்பு நின்று போவதும், புரதம், இரும்பு, துத்தநாகம் போன்ற ஊட்டச்சத்துப் பற்றாக்குறையும் முக்கியக் காரணங்கள்.

பெண்களுக்கு மாதவிலக்கு மற்றும் பிரசவ காலங்களில் ஏற்படும் புரதம், இரும்பு, துத்தநாகம் போன்ற ஊட்டச்சத்து இழப்பால் முடி உதிரலாம்.

தலைமுடி நன்றாக வளர புரதச் சத்தும் அவசியம். இது, வளர்ச்சியைத் தூண்டி, முடியைப் பாதுகாக்கும். புரதச் சத்து பற்றாக்குறை ஏற்படும்போது, தலைமுடி நிறம் மாறி, வலுவிழந்து, உடைந்துபோகும். முடி முழுமையாக அறுந்துபோகும்.

மாதவிலக்கின்போது அதிக உதிரப்போக்கு ஏற்பட்டால் அது ரத்த சோகைக்கு வழிவகுக்கும். ரத்த சோகை இருந்தால்தான் முடி உதிரும் என்பது இல்லை. கொஞ்சம் இரும்புச் சத்துப் பற்றாக்குறை இருந்தாலும்கூட முடி உதிரும்.

அதேபோல், உடல் வளர்ச்சி மற்றும் நலத்துக்கு துத்தநாகம் மிகவும் அவசியம். இந்தச் சத்து பல உணவுப் பொருள்களில் இருந்தாலும், அது ரத்தத்தில் உட்கிரகிக்கப்படாமல் போவது உண்டு. மேலும் சில நோய்களால் பாதிக்கப்படும்போது, துத்தநாகக் குறைபாடு உடலில் குறையும். அப்போதும் முடி கொட்டலாம்.

இரும்புச்சத்து குறைவு என்றால் அதற்கான மருந்து மாத்திரைகளுடன் உணவு விஷயத்திலும் அக்கறை வேண்டும். பேரீட்சை, கறிவேப்பிலை, கீரை வகைகளை அதிகம் சேர்த்துக்கொள்வதன் மூலம் இரும்புச்சத்துக் குறைபாட்டைத் குறைக்கலாம்.

முடி பிரச்சினை உள்ளவர்கள் தைராய்டு சுரப்பின் செயல்பாடு எப்படி இருக்கிறது என்று கண்டறிய வேண்டும். சினைப் பையில் கட்டியிருக்கிறதா என்று பார்க்க வேண்டும். கூடவே தேவையான இரும்புச் சத்து உள்ளதா எனவும் பரிசோதிக்க வேண்டும்.

ஹார்மோன் பிரச்சினை எனில், மீனை அதிகம் சாப்பாட்டில் சேர்த்துக் கொள்வது மற்றும் மருந்து மாத்திரைகள் மூலமும் சரி செய்துவிடலாம்.

ஆண்களுக்கான ஹார்மோன் அதிகம் இருந்தால், அதைக் குறைக்கக்கூடிய சிகிச்சையை மேற்கொள்ள வேண்டும். இயற்கை சாயம், ரசாயனம் இல்லாத தரமான ஷாம்பு, அரைத்து செய்யும் சீயக்காய்த்தூள் இவற்றைப் பயன்படுத்துங்கள்.

தினமும் தலைக்குக் குளிப்பது உடல் சூட்டை குறைக்கும். முடியை சுத்தமாக வைத்திருப்பதன் மூலமும் முடி உதிர்வதைத் தடுக்கலாம்” என்கிறார்கள்.

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்…

வச்சான் பாரு ஆங்கிள்– அப்டேட் குமாரு

தமிழிசை – அண்ணாமலை… ஒன்றாக போஸ் கொடுக்க உத்தரவு!

அமித்ஷா சொன்னது என்ன? தமிழிசை விளக்கம்!

போன் டேப் வழக்கு: சவுக்கு சங்கர் பதிலளிக்க நீதிமன்றம் உத்தரவு!

செய்திகளை உடனுக்குடன் பெற மின்னம்பலம் வாட்ஸ் ஆப் சேனலில் இணையுங்கள்!
Join Our Channel